خل الكلام اللي طعن صمت الأوراق
يحكي لك اللي ما نطقت او حكيته
ناظر عيوني شوف تأثير الأشواق
شوف الفرح و شلون بعدك جفيته
كتفي يشيل من الزمن فوق ما طاق
والضيق يرضى بي و انا ما رضيته
الى متى وانا انتظر لحظة اشراق
الى متى والحزن هالقلب بيته
الى متى و الهم ينحت بالأعماق
و اسقيه من فراقك دمع بكيته
يا صاحبي شف خاطري ما بعد راق
بنفس الطريق اللي انتهى ابتديته
ضاق الزمان وكل شي بعدك ضاق
حتى القصيد اللي بقلبي احتويته
عمر الشعر ما ضيق صدور الأوراق
الضيق ضيقي لا كتبت و قريته
تعبت اجمع ما بقى لي من اشواق
و اقول ليت الوقت يفهم ياليته
يا قو قلبك و انت محرقني احراق
ارفق بحال اللي ذكرك و نسيته
تدري عزاي ان حدك القلب تشتاق
دور علي بكل درب مشيته
يمكن تلاقي درب بدروب الفراق
يجوز ربي كاتبه و اهديته
و مدام ربي في يده قسمت الأرزاق
انا اقتنعت بما كتبته و رضيته
موضوع: قسمة الــارــزــاق..... 
